Original: Deutsch
[Blatt 3r. Paginierung von anderer Hand: 7, rechts oben]
Ich henne von Schaffheym vnd ich Veltin von Neysen burgere zcu fra(n)ckfort | bekenne(n) vor unß vnd vnsere erb(e)n vnd thun kunt vffentlich(e)n Inn diese(m) | brieff das wir bestanden han vnd besteen in crafft dieß briefs vmb den Er- | samen ingher(n) Bernhartten Rorbach zwene schenkkeller inn synem | gehuße Ernfels sehs iare langk die nehst nach eynander fulgen werd(en) | nach dat(?) dieß brieffs win dar inne zu legen vnd zu schencken ye des iare | besunder umb acht guld(en) guter franckfurter weru(n)ge daruß zu geb(e)n doch | also das yezuzytten die ihenen die im huse Ernfels wonen daß underscheydt | im keller zum hunderstelgin dyenen geprachen sollen ane verhinderunge | vnser vnd eins iglichen von vnsern weg(e)n Wir sollen auch umb der selb(e)n | inwoner willen uff daß sie obenvff mit rauch nit bekrodt werd(en) keyn fure | fuwer im gehuse Ernfels mach(e)n Auch inn denn messen keynen win | dar inne schencken Vnd den k krome vber dem keller hat jungher Bern- | hart macht zunerlichen vnd so der uzluhen ist Sollen noch enwollenn | wir die ihene(n) die yenn bestanden hetten daran nit verhindern noch bekrod- | den inne keyne wise Und wares sache das jungher Bernhart vorgñt | oder sin erben bynnen den vorgemelten sehs iaren die ganz husunge | Erenfelsch mit kellern und aller zugehoru(n)ge verlyhen oder verkeuffen | oder daz sye die zwene keller selber pruchen wolten daß sollen sie vnß | verkunden Vnd wir nach der verkundunge aber eynen moent yen die | zwene keller rumen geb(e)n vnd bezaln nach anczale was wir dar inne | versessen hetten vnd noch schuldig weren alles vngeudlich Deß zu ware(n) | urkunde sint dieser brieffe zwene glichlutende vßeynander gesnytten | vnd mit vnser beyder ingesiegel v(er)siegelt Der wir eyne vnd jungher | Bernhart den andern inhann Vnd geb(e)n sint vff Sanct Martins tag | deß heyligen Bischoffs Anno (domini) Mo cccco lxxo sexto
[Am rechten Rand neben Z. 1–7 Glosse von anderer Hand (Schreiber 2)] Henne von Schaffheim Bernhart Rorbach.1476.
[Transkription: Dr. Stefan Krüger, Frankfurt am Main]