Original: Deutsch
Ich Athanasius Magnus, Itziger Zeyt Pfarher zu Soltzbach, vnd Catharina, Meine Ehlige Hausfraw, Bekennen für vns vnd
alle vnsere Erben, das wir mit wolbedachtem mut vnd sinn, auch vnsers besten nutzen halben, verkaufft haben vnd
verkauffen In Crafft dieses brieffs dem Ersamen Geberts Hansen vnd Margretha, seiner Elichen Hausfrawen,
wonhafftig zu Soden, Nemlich vier guld brieff. Der ein betreffen ein Hub lants gena(n)t die Vrbeg Hub. Der ander
betreffen Jacob Schlemmer zw Obern Liedderbach. Der dritt betreffen Ludwig Molter zu Soden. Der viert guldbrieff
belangent wolffs Gang Conrad, auch zw Soden. Vnnd haben diesen Verkauff gethan vmb zweyhundert vnd dreisig gulden,
welchs ernent geld wir obgenant(en) Ehleut, Athanasius vnd Catharina, von Hansen vnd Margretha für die vier guldbrieff
gutlich entpfangen, vnd weiter Inn vnseren nutzen gewent. Bekennen derhalben In dieser schriefft, daß wir obgemelt(en) Eleut
oder vnsere Erben Nimmer merh keinen ansprach noch Inred der vier guldbrieff gegen den kauffern Hansen vnd
Margretha vnd Iren Leibs Erben haben wollen; wir dickgemelt(en) Eleut Athanasius vnd Catharina sagen vnß auch der vier gemelter
gulbrieff(en) gantz Queit , Ledig vnd loß, vnd das furter der kauffer mit den dickgemelt(en) guldbrieff(en) thun vnd schaffen mag,
alß mit seinen anderen Eigenen gutern. Vnnd sind bei diesem Verkauff gewesen die Ersamen Hilarius Harff,
Rechenschrieber zu Franckenfurt, vnd Seiffert Denberger , auch Burger zw Franckenfurt. Vnd diesem allen, vnd zw
merer sicherheit, haben wir obgemelt(en) Eleut Athanasius vnd Catharina gebett(en) den Ersamen Hanß Groß, Itziger Zeit
Schultheiß zu Soden, daß Er woll sein gewonlich sigel an dise Erkentniß henck(en), welchs Ich Hanß Groß also bekenn vnnd
gethan hab, doch mir vnd Meinen Erben Onschaden. Geschehen Im Jar nach der geburt vnsers seligmachers Jesu Christi
tausent feunffhundert Vnnd Sechßig feunff .